U komberiwa ku lemuka: Vuhundzuluxeri lebyi bya Xitsonga byi tekiwa ku suka eka nkandziyiso wa ximfumo wa Ndzawulo ya Vululami. Ha swi tiva leswaku byi katsa swihoxo swo tala swa vuhundzuluxeri, naswona hi le ku endleni ka vuhundzuluxeri lebyintshwa byo antswa.

Please note: This Xitsonga translation is taken directly from the official Department of Justice edition. We are aware that it includes many translation errors, and we are working towards a new, better translation.

Manghenelo

Hina, vanhu va Afrika Dzonga,

Hi lemuka ku pfumaleka ka vululami ka nkarhi lowu nga hundza;

Hi xixima lava xanisekeke hikwalaho ko hisekela vululami na ntshunxeko etikweni ra hina;

Hi hlonipha lava tirheke ku aka no hluvukisa tiko ra hina; no

Tshembha leswaku Afrika Dzonga i ya vanhu hinkwavo lava tshamaka eka rona, hi hlanganile hi ku hambana-hambana ka hina.

Kutani, hi ku tirhisa vayimeri va hina lava hi tihlawuleleke vona hi tshunxekile, hi amukela Vumbiwa leri tanihi nawu lowukulu wa Riphabliki ku endlela -

Ku tshungula ku hambana ka khale no vumba Rixaka leri nga simekiwa ehenhla ka mikhuva ya xidemokrasi, vululami bya rixaka na timfanelo ta masungulo ta ximunhu;
Ku simeka masungulo ya xidemokrasi na Rixaka leri nga erivaleni laha mfumo wu simekiweke eka ku tsakela ka vanhu naswona muaka-tiko un’wana na un’wana a sirheleriwile hi ku ringana hi nawu;
Ku antswisa nkoka wa vutomi bya vaaka-tiko hinkwavo no ntshunxa vuswikoti bya munhu un’wana na un’wana; no
Aka Afrika Dzonga leri hlanganeke ra xidemokiratiki leri ri kotaka ku teka vutshamo bya rona bya mfanelo tani hi tiko leri ntshunxekeke no tifuma endyangwini wa tinxaka.

Onge Xikwembu xi nga sirhelela Vanhu va ka hina.
Nkosi Sikelel’ iAfrika.
Morena boloka setjhaba sa heso.
God seën Suid-Afrika.
God bless South Africa.
Mudzimu fhatutshedza Afurika.
Hosi katekisa Afrika.